Crystal Palace një hap larg historisë, fiton 3-1 ndaj Shakhtar Donetsk në gjysmëfinalen e parë

Crystal Palace ka hedhur një hap të madh drejt finales së parë evropiane në histori, pasi mposhti në udhëtim Shakhtar Donetsk me rezultatin 3-1 në gjysmëfinalen e parë të UEFA Europa Conference League. Ndeshja nisi në mënyrë të furishme për londinezët, të cilët kaluan në avantazh pas vetëm 23 sekondash lojë me golin e Ismaïla Sarr, duke shokuar menjëherë vendasit. Edhe pse Shakhtar dominoi në posedim, duke mbajtur topin mbi 70% të kohës, skuadra ukrainase e kishte të vështirë të krijonte raste të pastra. Golin e barazimit e gjeti në fillim të pjesës së dytë përmes Oleh Ocheretko, duke rikthyer përkohësisht ekuilibrin në takim. Megjithatë, reagimi i Palace ishte i menjëhershëm dhe vendimtar. Daichi Kamada riktheu epërsinë për mysafirët, ndërsa Jorgen Strand Larsen vulosi fitoren me golin e tretë. Me këtë rezultat, Crystal Palace i afrohet ndjeshëm një arritjeje historike, ndërsa gjithçka pritet të vendoset në ndeshjen e kthimit pas një jave.