Cristiano Ronaldo Jr drejt Real Madridit? Talenti 15-vjeçar bën hapin e radhës në karrierë

Edhe pse është vetëm 15 vjeç, Cristiano Ronaldo Jr vazhdon të ndjekë gjurmët e babait të tij legjendar, Cristiano Ronaldo, duke tërhequr vëmendjen e klubeve më të mëdha europiane. Së fundmi, talenti i ri ka zhvilluar seanca stërvitore me ekipin U-16 të Real Madrid, duke rritur ndjeshëm spekulimet për një transferim të mundshëm në akademinë e klubit madrilen. Aktualisht, Ronaldo Jr është pjesë e akademisë së Al-Nassr në Arabinë Saudite, klub ku aktivizohet edhe babai i tij. Më parë, ai ka qenë pjesë e akademive të Manchester United dhe Juventus, duke ndjekur hap pas hapi rrugëtimin e CR7. Sipas raportimeve, qëndrimi në Madrid është ende në fazë prove dhe nuk ka një vendim përfundimtar për nënshkrimin, megjithatë mundësia që ai t’i bashkohet “Los Blancos” në të ardhmen mbetet e hapur. Paralelisht, Ronaldo Jr po shkëlqen edhe në arenën ndërkombëtare me grupmoshat e Portugalisë, duke u konsideruar si një nga talentet më premtues të brezit të tij. Nëse transferimi realizohet, do të ishte një rikthim simbolik për familjen Ronaldo në Madrid, aty ku babai i tij shkroi historinë dhe u bë një nga lojtarët më të mëdhenj të futbollit botëror.