Opozita s'ka rrugë tjetër, meqë ideja e Thaçit është e rrezikshme - Çollaku arsyeton seancën e jashtëzakonshme

Analisti Adrian Çollaku e ka cilësuar si të rrezikshme idenë e presidentit Hashim Thaçi për zgjidhjen e mosmarrëveshjeve me Serbinë, duke përligjur kështu thirrjen e seancës së jashtëzakonshme nga opozita në Kuvendin e Kosovës, për këtë çështje. Ai ka kërkuar nga Thaçi që ta qartësojë dhe shtjellojë idenë e tij, duke insistuar se mjegullnaja që është krijuar rreth saj nuk i shërben në asnjë formë gjetjes së një zgjidhje të qëndrueshme dhe të zbatueshme në terren. "Opozita nuk kishte opsion tjetër(nga seanca e jashtëzakonshme në kuvend), sepse po flasim për një temë që u hap nga presidenti, ku e përmendi çështjen e kufijve. Ai e quan korrigjim dhe është mirë ta sqarojë se çka nënkupton saktësisht me këtë fjalë. Nuk besoj se e kanë të qartë edhe këta që e mbështesin, si kryekuvendari, se çka ka nënkuptuar me korrigjim të territoreve". "Opozita në këtë situatë e ka pa një strategji te sajën qe ne këtë forme ta frenojë presidentin. E shohim një president që s'ka mbështetje nga partitë politike dhe futet në këtë temë. E kemi vetëm një parti, PDK-në që e mbeshtetë në këtë aventurë. Ne anën tjetër e shohim sot kryeministrin që thotë se nuk do ta mbështesë". "Presidenti flet për shkëmbim territoresh, por përdor termin korrigjim. Madje as ai nuk është i qartë në qëndrimet e tij. Ai nuk është i gatshëm që ta shtjellojë idenë e tij. Fillimisht ai duhet ta sqarojë çka është duke biseduar me Serbinë. "Çdo ditë që opozita e lejon presidentin të shkojë dhe ta prezantojë këtë tezë para bashkësisë ndërkombëtare pasojat do të jenë më të mëdha". "Kjo është ide shumë e rrezikshme, jo vetëm për shkak se rajoni ka probleme të këtilla. Mendoj se do të ketë telashe në Maqedoni dhe Bosnje. Por po ashtu, kush na garanton ne që nuk do të ketë probleme të këtilla pastaj edhe brenda vet shtetit tonë". "Sikur të donim të kishim plan konkret, do të duhej konsensus dhe në parlament të miratohej në platformë. Por presidenti nuk e ka informuar kurrë kuvendin, ndaj kemi një situatë të këtillë". /klankosova.tv