Chelsea dënohet nga Premier League për shkelje financiare, por dënimi është qesharak

Chelsea  është dënuar nga Premier League pas një hetimi të gjatë për shkelje të rënda financiare që lidhen me periudhën e pronësisë së Roman Abramovich. Sipas raportimeve të mediave britanike, përfshirë Sky Sports, arsyeja kryesore e dënimit janë pagesat e fshehta që klubi ka bërë ndër vite, të cilat nuk janë deklaruar te autoritetet e futbollit. Këto pagesa janë kryer ndaj lojtarëve, agjentëve të paregjistruar dhe palëve të treta, veçanërisht në periudhën 2011–2018. Këto veprime përbëjnë shkelje të rregullave të transparencës financiare dhe raportimit korrekt, pasi shumat nuk janë përfshirë në dokumentet zyrtare të klubit. Si pasojë, Chelsea është ndëshkuar me: Gjobë rreth 10.75 milionë paund. Ndalim transferimesh për ekipin e parë (i pezulluar, pra hyn në fuqi vetëm nëse përsëriten shkeljet). Ndalim të menjëhershëm për transferime në akademi për 9 muaj. Megjithatë, klubi ka shmangur një dënim më të rëndë si heqja e pikëve, kryesisht falë bashkëpunimit me autoritetet dhe faktit që shkeljet u vetë-raportuan nga pronarët aktualë pas vitit 2022. Hetimet lidhen kryesisht me menaxhimin e kaluar dhe jo me drejtuesit aktualë, por çështja mund të ketë ende pasoja të tjera pasi edhe Federata Angleze po zhvillon hetime shtesë./Klankosova.tv