Challandes liron nga grumbullimi katër futbollistë të Prishtinës

Me kërkesë të FC Prishtina dhe me qëllim të përkrahjes së klubeve tona për paraqitje sa më të mirë në garat evropiane, përzgjedhësi Bernard Challandes ka vendosur të lirojë nga grumbullimi i paraparë me Kombëtaren katër futbollistët e skuadrës kampione të Kosovës, e cila ka nisur përgatitjet për pjesëmarrje në parakualifikueset e Ligës së Kampionëve. Kërkesa e klubit ka ardhur pas publikimit të listës dhe disa ditë pasi Federata e Futbollit të Kosovës ua ka dërguar ftesat Gledi Micit, Endrit Krasniqit, Leonit Abazit dhe Lumbardh Dellovës, për dy miqësoret që do të zhvillohen në Antali kundër Guinesë dhe Gambisë, njofton Federata e Futbollit të Kosovës përcjell Klan Kosova. Prishtina bashkë me HB Tórshavn, Folgore dhe Inter Club d’Escaldes janë pjesë e fazës parakualifikuese. Kampionia e Kosovës do të përballet me Folgore apo Inter Club s’Escalades në një ndeshje gjysmëfinale dhe nëse fiton do të takohet me fituesin e gjysmëfinales tjetër në një ndeshje finale më 25 qershor. Fituesi kalon në rundin e parë kualifikues për një vend në edicionin 2020/21 të garës më prestigjioze evropiane për klube.