Challandes: Kundër Spanjës Kosova luajti me ndeshjen më të mirë prej se unë jam trajner

Përzgjedhësi i Kosovës në futboll Bernard Challandes, tha se kundër Spanjës Kosova e ka luajtur ndeshjen më të mirë të saj prej që ai e ka marrë drejtimin e skuadrës. Në këtë takim skuadra e drejtuar nga strategu zviceran humbi 2:0 kundër "Furisë së kuqe". Por, situata mund të ishte ndryshe sikur Vedat Muriqi dhe Milot Rashica t'i shfrytëzonin rastet e tyre. "Ndeshja me Spanjën ishte më e mira që prej se unë jam këtu. Mund të mos pajtoheni por ishte ndeshja më e mirë e jona sepse kemi luajtur kundër njërit prej ekipeve më të mira në botë". "Teknikisht ishte shumë e mirë dhe kemi luajtur me pasion dhe zemër. Kemi pasur më shumë raste shënimi se sa Spanja. Cili ekip ka pasur më shumë raste se Spanja në 10 ndeshjet e fundit, asnjë ekip. I kam parë ndeshjet. Ne kemi pasur më shumë raste shënimi dhe jemi mbrojtur me 11 lojtarë dhe u zhgënjeva për lojtarët. Ne kemi bërë punë të mirë me Spanjën dhe duhet ta vazhdojmë këtë". Nën drejtimin e Bernard Challandes, Kosova i ka fituar tetë ndeshje, i ka humbur nëntë ndeshje dhe ka barazuar në shtatë të tjera. Sot "Dardanët" do t'i nisin përgatitjet për dy ndeshjet kualifikuese për Kupën e Botës gjatë këtij muaji, kundër Suedisë në udhëtim më 9 tetor dhe kundër Gjeorgjisë në Prishtinë më 12 tetor. Në kualifikimet për kamionatin botëror "Qatar 2022" ka katër pikë në vendin e tretë në Grupin B, nëntë më pak se liderja Spanja dhe pesë më pak se vendi i dytë Suedia.