Çfarë po ndodh me tifo-skenën kosovare? - "Arpagjik't" ia marrin banerin "Kuq e Zinjve"

Tifozët zyrtarë të Vëllaznimit të Gjakovës udhëtuan sonte në Suharekë, për ta përkrahur skuadrën e tyre në ballafaqim me Yllin. Por pas këtij dueli kampional i cili u mbyll me rezultat 86-83 në të mirë të "Xhebrailave", ngjau një episod i rrallë, jashtë parketit. Tifo grupi prizrenas "Arpagjik't" i dolën në pritë "Kuq e Zinjve" gjakovarë, duke ia 'grabitur' banerin kryesor e identifikues, e më pas duke e postuar pastaj në faqen e tyre në facebook, njofton Klankosova.tv. Një rregull i pashkruar i fansave 'ultras' të sportit, e quan si shuarje të atij grupi, të cilit i merret 'transi'. Diçka e tillë kishte ndodhur edhe shumë vjet më parë, ku i njejti tifo-grup prizrenas, e kishin 'gllabëruar' banerin e "Shqiponjave" nga Peja. Prej asaj kohe, klubet sportive të qytetit të Pejës, përkrahen nga 'ultrasit' me emër të ri "United City Firm" (UCF), raporton Klankosova.tv.