Çfarë duhet të dini për dozën e tretë të vaksinës kundër COVID-19, të aprovuar në SHBA?

Administrata Amerikane e Ushqimit dhe Barnave të enjten autorizoi dozat e treta të të dy vaksinave kundër koronavirusit Pfizer/BioNTech ose Moderna për njerëzit me imunitet të komprometuar. Qendrat amerikane për Kontrollin dhe Parandalimin e Sëmundjeve kanë nënshkruar autorizimin dhe tani rekomandojnë një dozë shtesë të vaksinës për këta njerëz. Këto doza do të konsiderohen pjesë e serisë fillestare të vaksinimit, për njerëzit që nuk kanë krijuar përgjigjen imune të nevojshme. Një dozë përforcuese ndihmon në rifreskimin e një përgjigje imunitare në rënie, ose ndihmon trupin të luftojë një patogjen në zhvillim, raporton CNN, transmeton Klankosova.tv. CDC tha se njerëzit me imunitet të kompromentuar kanë më shumë gjasa të ju rëndohet gjendja pas infektimit, sesa ata me sistem imunitar të shëndetshëm. CDC tutje shpjegoi që asnjë recetë ose shënim i mjekut nuk është i nevojshëm, njerëzit mjafton të dëshmojnë nevojën e tyre për dozën e tretë dhe ato tashmë janë në dispozicion në barnatoret kryesore dhe zyrat e mjekëve. Disa ekspertë parashikojnë se një dozë përforcuese e vaksinës kundër koronavirusit mund të jetë e nevojshme çdo vit, por pavarësisht parashikimeve të tilla, Dr Anthony Fauci, drejtor i Institutit Kombëtar të Alergjisë dhe Sëmundjeve Infektive, ka thënë se përfundimin nuk e di ende askush.