“Carmen” shfaqet sonte për herë të parë në Prishtinë nga Opera e Kosovës

Katër aktet e veprës “Carmen” të kompozitorit francez Georges Bizet do të interpretohen sonte në Prishtinë, me rreth 200 artistë të angazhuar nga Opera, Filharmonia dhe Baleti Kombëtar i Kosovës. Nën organizimin e Operës së Kosovës, “Carmen”, e adoptuar nga novela e Prosper Mérimée, është një nga veprat më ikonike të muzikës klasike dhe realizmit në operë dhe mbetet një nga kryeveprat më të interpretuara në gjithë botën. “Carmen” vjen për herë të parë në këtë formë madhështore në kryeqytetin e Kosovës, e cila shfaq historinë e një gruaje të lirë dhe të pavarur dhe lidhjen e saj dashurore, pasionante e destruktive me Don Jose. Opera shkrihet në gërshetimin e dashurisë, pasionit, lirisë, obsesionit dhe tragjedisë. Carmen përbën një urë lidhëse midis traditës së opéra comique dhe realizmit apo verismo-s, që karakterizoi operën italiane të fundit të shekullit XIX. Muzika e Carmen-it është vlerësuar gjerësisht për brilancën e melodisë, harmonisë, atmosferës dhe orkestracionit, si dhe për mjeshtërinë me të cilën paraqiten emocionet dhe vuajtjet e personazheve. Premiera jepet sonte nga ora 20:30, ndërsa rishfaqja të enjten, më 24 korrik 2025, transmeton Klankosova.tv.