Cana: Franca dhe shtetet kyçe po e shkatërrojnë zgjerimin e BE-së për interesa të brendshme

Ish-kryeshefi i Agjencisë për Integrim Evropian, Edon Cana, tha se shtetet kyçe si Franca dhe shtetet e tjera po e shkatërrojnë zgjerimin e Bashkimit Evropian. Cana, në Info Magazine në Klan Kosova, tha se këto shtete po e bëjnë këtë për interesa të brendshme politike. "Mendoj që disa shtete kyçe si Franca dhe shtetet e tjera janë duke e shkatërruar zgjerimin në interesat e brendshme politike. Pra, politika e brendshme po e determinon procesin e zgjerimin dhe jo meritokracia dhe kjo është për të ardhur keq," tha Cana. Ish-ambasadori i Kosovës në Bullgari foli edhe për samitin e BE-së, të mbajtur sot në Bruksel. Ai e cilësoi këtë samit si të dështuar. "Është një dështim total. Është anuluar edhe konferenca e përbashkët për shtyp. Nuk ka ndonjë indikacion dhe kjo tregon që Bashkimi Evropian është në një krizë të thellë dhe e ka vështirë ta tejkalojë këtë ngërç të procesit të stërzgjatur të zgjerimit, i cili në një formë e ka humbur momentumin. Ky proces po stërzgjatet dhe po kalon në një proces rutinor"- tha ai. Përfaqësuesit e BE-së dhe Ballkanit Perëndimor, në të cilin morën pjesë liderët e 27 vendeve të Unionit, përfshirë presidentin e Këshillit të BE-së, presidenten e Komisionit Evropian dhe gjashtë udhëheqësit e Ballkanit Perëndimor. Në këtë samit ishte paraparë të diskutohej edhe për liberalizmin e vizave për Kosovën. As pas këtij samiti nuk u dha ndonjë datë për heqjen e vizave për kosovarët.