Bunjaku: Kosova favorite ndaj Moldavisë, kundër Greqisë nuk është e pamundur të fitohet

Ish-trajneri i Kosovës në futboll, Albert Bunjaku, ka komentuar dy ndeshjet e Dardanëve që njëra  do të zhvillohet sot dhe tjetra pas tri dite, kundër Moldavisë dhe Greqisë. Ai në Info Magazinën e Klan Kosovës, tha se Kosova do të jetë favorite ndaj Moldavisë, ndërsa kundër Greqisë, duel ky që do të zhvillohet me 6 shtator, i favorizon grekët. "Në fakt, pas një kohe të gjatë, Kosova fillon lojët dhe kjo është gjë e mirë. Si të gjitha ekipet edhe Kosova ka një kohë të gjatë të pauzës dhe mezi presim ta shohim formën e tyre. Moldavia, është kundërshtari me i dobët ne letër, por duhet të kemi respekt edhe ndaj një kundërshtari të tillë". "Nuk mendoj që Kosova do të ndryshojë stilin e lojës dhe jo ndaj një ekipi me të dobët se ne. Kosova do të ketë një mundësi të mirë të luajë lojën e vet dhe me ritmin që ka treguar mendoj që do të kalojë edhe më mirë se që kemi menduar, por duhet pasur kujdes sepse edhe ekipet më të dobëta dinë të befasojnë". 'Befasitë ekzistojnë, por Kosova është më kualitative dhe është një mundësi e mirë që të fillojmë me një kundërshtar më të lehtë në letër, që më pas të jemi gati ndaj një kundërshtari më të fortë". "Greqia është më e mirë se Kosova, por nuk është një kundërshtar i pamundshëm për t’u mposhtur". Bunjaku, tutje ka komentuar edhe formën e futbollistëve dardanë dhe avancimin e tyre në top-skuadrat evropiane. "Unë jam shumë i lumtur për futbollistët aktualë, ideja ka qenë edhe më parë që të grumbullohen lojtarët që janë në zhvillim, ku e kam cekur që për një kohë të shkurtër do të ketë katër ose pesë futbollistë në top ligat evropiane. Së fundmi e kemi Vojvodën që ka arritur në një nivel të mirë". Ish-trajneri, i pyetur për problemet që Kombëtarja e Kosovës në portë, tha se ky shqetësim është diskutuar nga ai qysh në vitin 2010. "Mendoj që probleme në portë kemi pasë çdo herë, unë e kam cekur këtë edhe në vitin 2010, sepse gjithë lojtarët shqiptarë kanë dëshirë të luajnë në repartet ofanzive. Ne duhet të punojmë për zbulimin e portierëve të ri, por Muriq dhe Bekaj, janë në ardhje të sukseseve më të mira". "Liga e Kombeve është t’iu ipet mundësia edhe ekipeve më të dobëta në letër që te kualifikohen. Mundësitë e kualifikimit në Botëror nga Liga C janë të vogla për Kosovën, por ne duhet të shohim në kualifikime të rregullta që do të ishte si mundësi më e mirë. Por, prioritet duhet të jetë ndeshja kundër Maqedonisë në muajin tetor".