Bislimi takon koordinatoren për Zhvillim të OKB-së, Arnhild Spence

 Zëvendëskryeministri i parë për Integrim Evropian, Zhvillim dhe Dialog i Kosovës, Besnik Bislimi, e ka pritur në takim Koordinatoren për Zhvillim të Kombeve të Bashkuara në Kosovë, Arnhild Spence. Ai i uroi Spencet mirëseardhjen në Kosovë, ndërkaq gjatë takimit u bisedua mbi bashkëpunimin e ngushtë me UNKT, si dhe u rikonfirmua gatishmëria për thellimin e bashkëpunimit dhe tejkalimit të sfidave të përbashkëta. “Znj. Spence shprehu gatishmërinë në vazhdimin e dhënies së kontributit të mëtejshëm nga UNKT për Kosovën. U diskutua mbi Strategjinë Kombëtare për Zhvillim dhe fokusin në zhvillimin e qëndrueshëm ekonomik, zhvillimin e barabartë njerëzor, siguria dhe sundimi i ligjit e qeverisja e mirë, ku dhe u përgëzua puna e Qeverisë në draftimin e kësaj strategjie”, thuhet në njoftimin e Zyrës së Kryeministrit. “Zëvendëskryeministri Bislimi tha se të gjitha strategjitë e Qeverisë, funksionojnë si shtysë ndaj njëra tjetrës dhe kontribuojnë në çuarjen përpara të një zhvillimi gjithëpërfshirës, në kuadër dhe të dy shtyllave të qeverisjes sonë, punësim dhe drejtësi, ku rritja dhe zhvillimi janë të qëndrueshme, me vëmendje të veçantë në mbrojtjen e shtresave të cenueshme të shoqërisë”. Në njoftim u përmend edhe ndarja e pakos 150 milionë euroshe për përballimin e inflacionit, si dhe ajo e 100 milionëve për subvencionimin e energjisë. “U përmend ndarja e 150 milionë eurove për pakon për përballjen me inflacion, ndarja e 100 milionë eurove për subvencionim të energjisë, si dhe mbështetja e vazhdueshme për studentët, pensionistët dhe përfituesit e skemave sociale”. “U cilësua me rëndësi dhe u ritheksua objektivi i përbashkët i thellimit të bashkëpunimit, vazhdimi i përkrahjes nga ana e UNKT dhe arritja e qëllimeve lidhur me Objektivat e Zhvillimit të Qëndrueshëm”.