Lajmet e fundit
Ish-presidenti i Shteteve të Bashkuara të Amerikës, Bill Clinton, po e zhvillon vizitën e tij të parë në Shqipëri.
E mirëseardhje i dëshiroi presidenti i Shqipërisë, Bajram Begaj, përmes një postimi në Facebook.
Begaj i tha Clintonit se "Shqipëria dhe shqiptarët ju janë përjetë mirënjohës për gjithçka që keni bërë për kombin tonë e në veçanti për Kosovën".
"Vendimmarrja dhe lidershipi juaj në ditët më vendimtare për të ardhmen e Kosovës ju kanë vendosur në piedestalin e miqve tanë më të shtrenjtë. Ju faleminderit nga zemra!", tha Begaj.
Presidenti nuk do të marrë pjesë në ceremoninë e pritjes së ish-presidentin amerikan Bill Clinton e cila do të zhvillohet në orën 19:00 në Bulevardin “Dëshmorët e Kombit” përballë Kryeministrisë në Tiranë.
Burime të "Euronews Albania" kanë bërë me dije se ai do të mungojë në ceremoni për arsye shëndetësore.
Ish-presidenti i ShBA-së Bill Clinton ka mbërritur më herët në aeroportin e Rinasit, ku u prit nga kryeministri i Shqipërisë, Edi Rama.
Clintoni me një ceremoni shtetërore do të nderohet me çmimin “Ylli i Mirënjohjes për Arritjet Publike”.
