Bastien Toma dhe Toni Domgjoni s'kanë refuzuar të luajnë për Kosovën

Shpesh është përmendur emri i futbollistëve kosovarë Bastien Toma dhe Toni Domgjoni nëse do ta përfaqësojnë Kosovën, apo Zvicrën në futboll (ekipin e parë). Redaksia e Sportit në Klan Kosova, ditë më parë, ka kontaktuar Toni Domgjonin dhe babanë e Bastien Tomës, Pjetrin, ku të dy kanë thënë se janë duke e shqyrtuar mundësinë që të luajnë për Kosovën. Domgjoni ka thënë se nuk ka asgjë të vërtetë në raportimet se ai e ka refuzuar Kosovën, derisa njëjtë është deklaruar edhe babai i Bastien Toma, Pjetri. Në ndërkohë, Federata e Futbollit të Kosovës ka thënë se futbollisti i Cyrihut dhe ai i Genkut nuk e kanë refuzuar fanellën e Kosovës, por as nuk e kanë konfirmuar se do të luajnë. “Federata e Futbollit të Kosovës nuk ka marrë asnjë përgjigje zyrtare prej tyre, as pranim as refuzim”. Ata në një përgjigje për Klan Kosovën kanë sqaruar se të dy futbollistët mund të vazhdojnë të luajnë për Zvicrën U21 dhe pas përfundimit të kampionatit të bëjnë zgjedhjen e tyre. “Toma dhe Domgjoni kanë plotësisht të drejtë të luajnë për Zvicrën U21 dhe kjo për ne nuk paraqet problem. Pas këtij kampionati mbetet të vendosin të dy nëse dëshirojnë t’i bashkohen Kosovës ose jo”. Toma dhe Domgjoni kanë qenë ndër futbollistët kyçë në kualifikimin e Zvicrës U21 në Kampionatin Evropian për këtë gjeneratë, ku Zvicra U21 është në grup me Anglinë, Portugalinë dhe Kroacinë. Toma dhe Domgjoni do ta përfaqësojnë Zvicrën U21 në EURO 2021, kurse pas përfundimit të këtij kampionati, më 6 qershor 2021, kanë mundësi të zgjedhin Kosovën A për ta përfaqësuar, e po ashtu edhe Zvicrën A. Të dy nuk janë përfshirë në listën e Kosovës për ndeshjet e marsit, sepse ata do të luajnë në Evropianin U21 duke përfaqësuar Zvicrën. Kjo nënkupton se refuzim zyrtar për Kosovën e as për Zvicrën A nuk ka akoma!

klankosova.tv