Asisti 485 sonte ma pak muhabet dhe përplot aksion basketbolli

Pas pushimit të kupës dhe parakualifikimeve të përfaqësueses, kthehen përmbledhjet dhe analizat e komplet të gjitha ligave vendore dhe atyre ndërkombëtare. Garat e kupës dhe ndeshjet parakualifikuese të përfaqësueses së Kosovës për 'Eurobasket 2025' përfunduan dhe tash është koha për rikthimin komplet të aksionit të ligave kosovare, mbarëkombëtare shqiptare dhe atyre ndërkombëtare. Sonte në ASISTIN 485 sjellim analizën e detajuar të xhiros 21 të Artmotion Superligës dhe në veçanti dy ndeshjeve të zjarrta dhe dramatike të zhvilluara të dielën: Sigal Prishtina – Prizreni 16 dhe Rahoveci – Trepça, ku fituesit u vendosën në sekondat e fundit. Gjatë kësaj kohe pati lëvizje dhe transferime bombastike, madje edhe ardhje nga NBA.

Si debutoi i rikthyeri në Kosovë, Darell Davis, tash fundori bardh e zi prizrenas, që u ndesh me Sigal Prishtinën?
Çfarë performance pati ish-lojtari i NBA Rodney Purvis në debutimin e tij te Trepça, në Mizahir Isma?
Cila është pesëshja dhe kush është MVP i javës në ASIST?

ASISTI 485 gjithashtu sjell analizat e Superligës së Femrave, ndeshja fantastike e Ligës së Parë të Meshkujve, Happy Dukagjini – Marigona Hill Prishtina, ku u shënuan 230 pikë dhe shifra kozmike individuale; blloku jashtëzakonisht i pasur i përmbledhjeve nga Liga Unike e Meshkujve dhe Femrave. Rubrika për të gjithë ne shumë e dashur dhe unike, Shqiptarët në Botë edhe sonte sjell lajmet më të reja lidhur me suksesin dhe performancat e basketbollistëve shqiptarë që luajnë anekënd Evropës dhe përtej Oqeanit Atlantik. Natyrisht, pjesa e fundit i dedikohet përmbledhjes së lajmeve nga ABA, Euroleague dhe NBA, kurse përmbylljen e bëjmë me Top 10 aksionet e Javës nga Artmotion Superliga. Gjitha këto dhe shumë më tepër sonte në ASISTIN 485 duke filluar nga ora 21:00 në Art Sport 1 dhe 10 minuta pas mesnatës në Klan Kosova. KËNAQUNI!