Anthony Joshua në gjendje të mirë shëndetësore, lirohet nga spitali

Boksieri britanik Anthony Joshua është liruar nga spitali, thanë autoritetet nigeriane të mërkurën vonë në mbrëmje. Siç shkruan The Guardian, ish-kampioni dy herë i botës në peshat e rënda dhe fitues i medaljes së artë olimpike në Londër 2012 ishte pasagjer në një aksident automobilistik pranë Lagosit të hënën, aksident që shkaktoi vdekjen e dy bashkëpunëtorëve dhe anëtarëve të ngushtë të ekipit të tij. 36-vjeçari ishte duke u rikuperuar nga lëndime të lehta, kishte thënë promotori i tij të hënën. Komisioneri i shtetit të Lagosit për informim dhe strategji, Gbenga Omotoso, tha në një deklaratë në X se Joshua ishte liruar nga spitali Lagoon në Ikoyi të mërkurën pasdite, pasi ishte vlerësuar klinikisht si i aftë për t’u “rikuperuar në shtëpi”. “Anthony dhe nëna e tij ishin në morgun e Lagosit këtë pasdite për të dhënë respektin e fundit ndaj dy miqve të tij të ndjerë” tha Omotoso. Latif Ayodele, trajner personal i Joshuas, dhe Sina Ghami, trajner për forcë dhe kondicion, humbën jetën në aksidentin më 29 dhjetor. Omotoso tha se boksieri ishte “i pikëlluar dhe i mbushur me emocione për humbjen e dy miqve të tij të ngushtë”. Disa orë para aksidentit, Joshua dhe Ayodele kishin postuar në rrjetet sociale video ku shfaqeshin duke luajtur ping-pong së bashku. Joshua kishte fituar së fundmi një ndeshje kundër boksierit YouTuber Jake Paul më 19 dhjetor, duke shënuar rikthimin e tij në ring pas një mungese prej 15 muajsh.