Ish-kampioni dy herë i botës në peshat e rënda, Anthony Joshua, ka folur për herë të parë që nga aksidenti i tmerrshëm me makinë në Nigeri që mori jetën e miqve të tij të ngushtë, Latif Ayodele dhe Sina Gami. 36-vjeçari Joshua ishte ulur në sediljen e pasme të SUV-it kur ky i fundit u përplas me një kamion të parkuar pranë Lagosit të hënën e kaluar.
Boksieri i shpëtoi mrekullisht vdekjes, duke kaluar disa ditë në spital para se të dilte nga spitali në natën e Vitit të Ri.
Të premten, Joshua u kthye në Mbretërinë e Bashkuar dhe postoi një foto në rrjetet sociale me familjet e miqve të tij të ndjerë, me mbishkrimin: “Roja i vëllait tim”, shkruhet në postim, transmeton Klankosova.tv
Funeralet për Ayodele dhe Gami po mbahen në Londër, megjithëse mbetet e paqartë nëse boksieri do të marrë pjesë. Joshua dhe nëna e tij, Yeta Odusanya, kishin bërë më parë homazhe në shtëpinë e funeralit përpara se miqtë e tyre të riatdhesoheshin në Mbretërinë e Bashkuar.
Më parë, Policia e Shtetit të Ogunit konfirmoi se shoferi i Joshuas, Adeniyi Mobolaji Kayode, 46 vjeç, u akuzua zyrtarisht për vrasje të paqëllimshme, drejtim mjeti të rrezikshëm dhe të pakujdesshëm, drejtim mjeti pa kujdesin e duhur dhe drejtim mjeti pa patentë të vlefshme.
Çështja i është referuar Gjykatës së Magjistraturës Sagamu, me një seancë dëgjimore të caktuar për 20 janar 2026.
Incidenti ndodhi vetëm disa ditë pas fitores dominuese të Joshuas në ring, ku ai e nokautoi ish-YouTuber-in e kthyer në boksier Jake Paul në raundin e gjashtë në Miami. Më parë pritej që Joshua të kthehej në ring muajin e ardhshëm dhe të përballej me Tyson Furyn në verë. /Klankosova.tv ●●●
VZSHKRIMI NGA
Vanesa Zhugolli
Editorial nga Klan Kosova — ndjek sport dhe zhvillimet e tjera kryesore të vendit.
