Allegri tregon kur do të kthehen nga lëndimet Leao dhe Maignan

Trajneri i Milanit, Massimiliano Allegri ka folur në konferencën për media në prag të ndeshjes ndaj Udinese në Friuli. Allegri është pyetur për gjendjen e Rafa Leaos i cili nuk luan nga ndeshja kundër Barit në fillim të gushtit në Kupën e Italisë, si dhe për portierin francez Maignan që doli i lënduar në fitoren e fundit përballë Bolognës. "Kur kthehet Leao? Po shkon mirë, shpresojmë ta kemi javën e ardhshme në dispozicion për ndeshjen kundër Napolit. Do të duhet ta vlerësojmë”. “Mike është mirë, i qetë, besoj që të martën do të jetë në portë kundër Lecces në Kupën e Italisë", u shpreh Allegri. Trajneri nga Livorno u rikthye edhe te polemikat lidhur me VAR-in në ndeshjen  kundër Bolognës. "Mund të them se VAR është një instrument që i ka përmirësuar ndeshjet sepse ka ulur gabimet. Por, siç kam thënë gjithmonë, VAR në disa situata është subjektiv”. “Gabime ka pasur, ka dhe do të ketë përsëri, ndaj aty duhet përmirësim. Duhet ta bëjmë sa më objektiv të jetë e mundur", përfundoi trajneri i Milanit.