Agjentë të maskuar të ShBA-së arrestojnë studenten turke derisa po shkonte për në iftar (VIDEO)

Rumeysa Ozturk, një doktorante turke në Universitetin Tufts, u arrestua në Massachusetts nga agjentët e Ministrisë së Sigurisë së Brendshme të ShBA-së, pa asnjë paralajmërim apo shpjegim. Siç raportohet, ajo ishte duke shkuar për iftar në Somerville kur u ndalua dhe u arrestua nga gjashtë agjentë me fytyrat të mbuluara. Videoja e arrestimit tregon momentin kur ata i konfiskuan telefonin dhe e vendosën në pranga, raporton “Independent”. Avokatja e Ozturk, Mahsa Khanbabai, tha se autoritetet refuzuan të japin informacion mbi vendndodhjen e saj dhe statusin e arrestimit. Ajo shtoi se deri tani nuk janë ngritur akuza kundër saj. Ozturk ka qenë bashkautore e një teksti që kërkonte njohjen e “gjenocidit palestinez” dhe për tërheqjen e investimeve nga Tufts që lidhen me Izraelin. Pas kësaj, emri i saj u shfaq në një faqe që shënjon aktivistët pro-palestinezë në ShBA. Pas arrestimit, ajo u dërgua në një qendër për deportime në Luiziana, pavarësisht urdhrit nga gjykatësja federale që të mos e transferonin pa një njoftim paraprak. Aktivistë dhe studentë të Universitetit Tufts janë mbledhur për të kërkuar lirimin e saj dhe për të ndaluar deportimin. /Klankosova.tv