Agim Ademi takon Belgin Jasharin: Ngjarjet me sfond racor nuk kanë vend në sportin tonë

Kryetari i Federatës së Futbollit të Kosovës, Agim Ademi, ka takuar futbollistin Belgin Jashari i cili së fundmi u sulmua në baza racore. “Sot, në ambientet e Federatës së Futbollit të Kosovës, mirëpritëm futbollistin e talentuar Belgin Jashari, i cili së fundmi ishte viktimë e një sulmi të papranueshëm gjatë një ndeshjeje futbolli, ngjarje për të cilën u reagua gjerësisht në opinionin publik dhe nga të gjithë ju dha përkrahje këtij talenti”, thuhet në postimin e FFK-së në Facebook. “Federata e Futbollit e Kosovës edhe një herë dënon fuqishëm çdo formë dhune, teksa vendimet për lëshimet në organizimin e ndeshjes nga klubi vendas tashmë janë marrë, në përputhje me rregulloret e garave”. FFK-ja thotë se do ta luftojë secilin akt diskriminues dhe të kujdeset që futbolli të jetë hapësirë e barazisë. “FFK është e vendosur që të luftojë pa kompromis çdo akt diskriminues dhe të kujdeset që futbolli të vazhdojë të mbetet një hapësirë e barazisë, respektit dhe bashkimit.  Ngjarjet me sfond racor, gjinor apo fetar nuk kanë vend në sportin tonë”. “Belgin, jemi krenarë për forcën dhe qetësinë që ke treguar - dhe do të qëndrojmë gjithmonë në përkrahje Ty dhe të gjithë fëmijëve që po rriten si futbollistë në fushat e futbollit në Kosovë”.