Bislimi e quajti Kosovën demokracinë e vetme në rajon, Çitaku: E papjekur dhe e papranueshme

Nënkryetarja e Partisë Demokratike të Kosovës, Vlora Çitaku, ka reaguar ndaj një postimi të zëvendëskryeministrit, Besnik Bislimi, i cili mes tjerash e quajti Kosovën si demokracinë e vetme në rajon. Bislimi tha për veprimet e presidentit serb Aleksandër Vuçiq kanë për qëllim edhe “rrezikimin e demokracisё sё vetme nё Ballkanin Perёndimor duke e portretizuar Kurtin si palё jobashkёpunuese dhe tё painteresuar pёr normalizim”. Ndërkaq, njeriu i dytë në PDK e kritikoi këtë shkrim të Bislimit, duke e akuzuar për etiketim të të gjitha vendeve të rajonit si jodemokratike dhe aleatët e Kosovës si të paaftë për t’i lexuar drejt veprimet e Serbisë. “Pabesueshmërisht e papjekur dhe thellësisht e papranueshme deklarata e ZVKM Bislimi sot”, ka shkruar Çitaku në Facebook. “Si është e mundur që me një deklaratë, ZVKM, në vend se të falënderojë aleatët që siguruan lirimin e policëve të rrëmbyer, etiketon të gjitha vendet e rajonit si jodemokratike, dhe aleatët tanë si të pa aftë për të lexuar drejtë veprimet e Serbisë.”. “ZVKM, SHBA-të dhe BE nuk kanë nevojë për leksione (dhe atë mediokre) nga askush për t’ua sqaruar kush është Serbia. E dinë fare mirë. Kanë shërbime inteligjente shumë më të avancuara e të sofistikuara se ne”. “Ndërkohë, Shqipëria, Maqedonia e Veriut dhe Mali i Zi janë aleatë tanë. Që të tria anëtare të NATO-s, dhe vende kandidate me negociata të hapura për anëtarësim në BE”. “Për më tepër, doza e ironisë shumëfishohet kur këto deklarata vijnë nga një eksponent i lartë i një qeverie e cila u ka shpallur luftë mediave, sindikatave, bizneseve, dhe secilit që nuk mendon si ata”.