400 mijë të zhvendosur kthehen në Liban, mijëra ende pa shtëpi të banueshme

Rreth 400,000 banorë të Libanit që u zhvendosën për shkak të luftës janë kthyer në jug të vendit, ndërsa pritet që në ditët e ardhshme të kthehen edhe më shumë persona, ka bërë të ditur një ministër i qeverisë të martën. Kthimet janë nxitur nga një qetësim i përkohshëm i konfliktit katërmujor mes Izraelit dhe Hezbollahut.

Megjithatë, një numër i madh njerëzish ende nuk mund të kthehen në shtëpitë e tyre.

Që nga muaji mars, rreth 1 milion persona janë detyruar të largohen nga banesat e tyre, ndërsa shumë prej tyre vazhdojnë të qëndrojnë në strehimore apo banesa të përkohshme, për shkak se shtëpitë e tyre janë shkatërruar ose janë të pabanueshme, ka deklaruar Hanine El Sayed, transmeton Klankosova.tv.

“Bëhet fjalë për familje që mund të kthehen në diçka, të paktën në kushtet minimale,” tha ajo për Reuters.

“Fakti që të tjerët nuk janë kthyer tregon se situata e tyre është shumë më e vështirë.”

Autoritetet presin që kthimet të vazhdojnë edhe në ditët në vijim dhe shpresojnë që brenda rreth një jave të kenë një pasqyrë më të qartë të numrit të familjeve që nuk mund të kthehen fare.

“Brenda rreth një jave… do të kuptojmë më mirë përmasën e problemit – sa shumë nuk mund të kthehen absolutisht, sepse shtëpitë e tyre janë dëmtuar plotësisht,” tha ajo.