20 vjet nga ndeshja e Italisë me Korenë e Jugut, autori që ‘theu’ zemrat e italianëve thotë se ishte fitore me meritë

Ish-sulmuesi i Koresë së Jugut, Ahn Jung-hwan, i cili theu zemrat e italianëve me golin e tij në Kupën e Botës 2002, vlerëson se skuadra e tij e meritonte fitoren. Në 20-vjetorin e fitores së famshme të skuadrës aziatike me golin e artë 2-1 ndaj Azzurrit, Ahn rishikoi ndeshjen e famshme që pa nikoqirët të kualifikoheshin në çerekfinalet e Kupës së Botës. “E mbaj mend sikur të ishte dje. Ishte një ndeshje vërtet e veçantë për mua dhe vendin tim”. “Askush nuk besonte se ne mund ta mposhtnim Italinë. Pas gjithë kësaj kohe ende diskutohen vendimet e arbitrit”, transmeton Klankosova.tv. “Mendoj se thjesht duhet të shikoni përgatitjen tonë, mënyrën se si luajtëm. Menaxheri Guus Hiddink na bëri një ekip të fortë fizikisht dhe psikologjikisht. Ne nuk kishim frikë nga askush”. Një nga pikat më të rëndësishme të asaj përplasjeje të 18 qershorit 2002 ishte shfaqja e arbitrit ekuadorian Byron Moreno, i cili i akordoi Koresë së Jugut një penallti në pjesën e parë, anuloi atë që do të kishte qenë një gol i artë nga Damiano Tommasi për një pozicion të diskutueshëm jashtë loje dhe i akordoi Francesco Tottit një karton të dytë të verdhë për simulim kur ishte 40 metra larg incidentit. Vendimet e kthyen Moreno-n në një figurë të urrejtjes në Itali. I pyetur për atë, Ahn shtoi: “Ne e kemi respektuar gjithmonë vendimin e arbitrit, atë përfundimtar dhe të pakthyeshëm”. “Ne pranuam gjithçka, edhe nëse ndonjëherë rezultati ishte i dhimbshëm. E vërteta është se ishim të përgatitur mirë për ndeshjen ndaj Italisë. Ne analizuam çdo detaj të çdo lojtari të Italisë”. Nikoqiri i përbashkët Koreja e Jugut arriti në gjysmëfinale, ku përfundimisht u mund nga Gjermania nënkampione dhe Ahn sugjeron se skuadra e tij e meritonte plotësisht fitoren ndaj Azzurrit. Ai tha: “Vetëm shikoni rezultatet e vendit tim në miqësoret që çojnë në Kupën e Botës 2002. Ne humbëm vetëm dy nga tetë ndeshje kundër Uruguait dhe Francës”. “Pastaj puna e madhe e bërë nga Hiddink, i cili na bëri lojtarë të ndryshëm. Ndiheshim sikur mund të ishim surpriza e madhe e turneut.” https://twitter.com/i/status/1221722436015738880