10 vjeçarja nga Londra bëhet mjeshtre e madhe e shahut në botë

Një vajzë 10-vjeçare me talent në shah nga veriperëndimi i Londrës është bërë personi më i ri që fiton titullin mjeshtre ndërkombëtare për femra. Bodhana Sivanandan, nga Harrow, u bë gjithashtu lojtarja më e re femër që mundi një mjeshtër të madh shahu në Kampionatin Britanik të Shahut 2025 në fillim të këtij muaji. Në vitin 2024, Bodhana mendohej të ishte bërë personi më i ri që përfaqësoi ndonjëherë Anglinë ndërkombëtarisht në ndonjë sport kur u zgjodh për Ekipin e Grave të Anglisë në Olimpiadën e Shahut në Hungari. Babai i saj, Siva, i tha më parë BBC-së se nuk kishte idenë se nga e mori talentin vajza e tij, pasi as ai dhe as gruaja e tij, të dy të diplomuar në inxhinieri, nuk janë të mirë në shah. Federata Ndërkombëtare e Shahut tha në llogarinë e saj në rrjetet sociale në X se Bodhana "arriti fitoren kundër Mjeshtrit të Madh 60-vjeçar Peter Wells në raundin e fundit të Kampionatit Britanik të Shahut 2025 në Liverpool". Federata shtoi: "Fitorja e Sivanandan në 10 vjet, pesë muaj dhe tre ditë thyen rekordin e vitit 2019 të mbajtur nga amerikania Carissa Yip (10 vjet, 11 muaj dhe 20 ditë)." Mjeshtre e Madhe është titulli më i lartë që një shahiste mund të arrijë dhe ky titull mbahet për gjithë jetën. Titulli i ri i Bodhanës - mjeshtre ndërkombëtare femër - është titulli i dytë më i lartë që u jepet ekskluzivisht grave, i dyti pas mjeshtres së madhe femër. Bodhana filloi të luante shah për herë të parë gjatë pandemisë Covid-19. Ajo i tha BBC-së vitin e kaluar: "Kur një nga miqtë e babait tim po kthehej në Indi, na dha disa çanta [me sende]. "Kishte një tabelë shahu dhe unë isha e interesuar për gurët, kështu që fillova të luaja." Ajo thotë se shahu e bën të ndihet "mirë" dhe e ndihmon me "shumë gjëra të tjera si matematika, si të llogarisë", shkruan BBC, transmeton Klankosova.tv.