ZPS kërkon vazhdimin e paraburgimit për Jakup Krasniqin

Zyra e Prokurorit të Specializuar (ZPS), ka kërkuar vazhdimin e paraburgimit për Jakup Krasniqin. Në kërkesën e parashtruar më 24 prill 2024, prokurorja e specializuar Kimberly West ka thënë se që nga shqyrtimi i fundit për rishikimin e masës së paraburgimit për Krasniqin nuk ka pas zhvillime tjera që ndryshojnë rrethanat për këtë masë. Në veçanti, ZPS parashtron që pas dëshmisë së dëshmitarit të 53-të dhe zhvillimeve të tjera në këtë rast është shtuar domosdoshmëri e paraburgimit për Krasniqin. “Që nga vendimi më i fundit për paraburgim, nuk ka pasur zhvillime që zvogëlojnë faktorët që mbështesin nevojën dhe arsyen për paraburgim. Së vërteti, vazhdimi i gjykimit me dëshminë e dëshmitarit të pesëdhjetë e tretë (53) dhe zhvillimet e tjera në rast shtojnë domosdoshmërinë e paraburgimit”, thuhet në parashtrimin e ZPS-së. Po ashtu, ajo tha se është konfirmuar vazhdimisht se ekziston dyshimi i bazuar se Krasniqi ka kryer krime lufte. “Në të vërtetë, është konfirmuar vazhdimisht se ekziston dyshimi i bazuar se Krasniqi ka kryer krime brenda juridiksionit të DhSK-së”, thuhet në parashtrimin e ZPS-së. West ka potencuar se për Krasniqin ekziston rreziku i arratisjes, pengimit të procedurës dhe kryerjes së mëtejshme të krimeve. “Krasniqi është i vetëdijshëm për akuzat e rënda të konfirmuara kundër tij, dënimin e mundshëm të gjatë me burgim që mund të rezultojë prej tyre, dhe ai vazhdimisht po fiton më shumë njohuri për provat në lidhje me ato krime. “Ecuria e gjykimit rrit rrezikun e arratisjes në një nivel edhe më të lartë, pasi Krasniqi tani sheh që provat kundër tij po hyjnë vazhdimisht në rekord”, thuhet në parashtrimin e ZPS-së. Si rrjedhojë, ZPS-ja ka theksuar se edhe Paneli ka konstatuar se rreziku që Krasniqi të pengojë mbarëvajtjen e procedurave gjyqësore vazhdon të ekzistojë. Ata gjithashtu deklaruan se ekziston një klimë e vazhdueshme e frikësimit të dëshmitarëve për të cilin edhe Apeli është pajtuar se ky konstatim është relevant dhe kontekstual. “Gjetje të ngjashme janë bërë në Aktgjykimin Gjyqësor Mustafa29 dhe në Aktgjykimi i Apelit Gucati dhe Haradinaj.30 Trupi Gjykues i Rastit të 7-të konsideroi se ‘mbrojtja e dëshmitarëve ka vazhduar të jetë një çështje e gjallë dhe kritike në Kosovë’,31 dhe vlerësoi dëshminë e ekspertit mbrojtës Robert Reid, i cili theksoi se, në mbi 20 vjet në në terren, ai kurrë nuk kishte parë frikësim të dëshmitarëve në nivelin që ekziston në Kosovë”, thuhet në parashtrimet e ZPS-së. ZPS-ja ka parashtruar se Krasniqi ka marrë informacione në lidhje me dëshmitarët që ZPS-ja synon t’i thërras në bllokun e ardhshëm dhe se kjo gjë sipas tyre rritë rrezikun e frikësimit të tyre. ZPS thonë se krimet për të cilat akuzohet Krasniqi janë jashtëzakonisht të rënda dhe vendimi për konfirmimin e aktakuzës përshkruan pjesëmarrjen e Krasniqit në këto krime. Andaj, rreziqet përkatëse duke përfshirë edhe atë të arratisjes, sipas ZPS-së mund të menaxhohen në mënyrë efektive vetëm në objektin e paraburgimit, ashtu siç edhe ka konstatuar Paneli. Si rrjedhojë e të gjitha këtyre, ZPS-ja në parashtrimet e veta ka thënë se Krasniqi duhet të vazhdojë që të mbetet në paraburgim. “Për arsyet e lartpërmendura, ZPS-ja me respekt parashtron se Krasniqi duhet të mbetet i paraburgosur”, thuhet në parashtrimin e ZPS-së. Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit. Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë. Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor. Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /BetimipërDrejtësi/