Zotimi i Trumpit për riangazhim në normalizimin e raporteve Kosovë-Serbi, krejt çka u tha

Presidenti i ShBA-së Donald Trump, ka paralajmëruar një rikthim në çështjen Kosovë-Serbi. Gjatë ditës së djeshme, Trump deklaroi se gjatë mandatit të tij të pare, ka arritur ta parandalonte një konflikt të mundshëm mes dyja vendeve, që sipas tij ishte afër një shpërthimit. “Gjatë mandatit tim të parë, Serbia dhe Kosova po përballeshin me forcë, ashtu siç kanë bërë për dekada, dhe ky konflikt i gjatë ishte gati të shpërthente në LUFTË”, tha ai transmeton Klankosova.tv. Më tej, ai kritikoi ish-presidentin Joe Biden, duke thënë se vendimet e tij kanë dëmtuar perspektivat afatgjata për paqe në rajon, por premtoi se do ta rregullojë këtë situatë. “Unë e ndalova. (Biden ka dëmtuar perspektivat afatgjata me disa vendime shumë budallaqe), por do ta rregulloj përsëri”, tha Trump, transmeton Klankosova.tv. Ndërkaq lidhur me deklarimin e të parit të Shtëpisë së Bardhë, pati edhe reagime mbështetëse nga Kosova. Pal Lekaj nga Aleanca për Ardhmërinë e Kosovës ka deklaruar se mesazhi i fundit i presidentit amerikan Donald Trump për t’u angazhuar sërish në zgjidhjen e çështjes ndërmjet Kosovës dhe Serbisë, dëshmon se ai është i vendosur për paqe. Duke folur për Klankosova.tv, i njëjti është shprehur se ishte pikërisht gjatë Presidencës së kaluar Trump kur u arrit një dinamikë e re në dialog, përmes rolit aktiv të Shteteve të Bashkuara, që kulmoi me Marrëveshjen e Uashingtonit në vitin 2020. “Presidenti Trump e dëshmoi atëherë se është i vendosur për paqe, stabilitet dhe zhvillim ekonomik në Ballkan, pa burokraci të tejzgjatur dhe me një qasje të qartë pro-amerikane që u dallua nga pasiviteti i institucioneve evropiane”, ka deklaruar Lekaj. “Për ne Shtetet e Bashkuara kanë qenë gjithmonë aleati ynë strategjik dhe garancia kryesore e lirisë dhe pavarësisë së Kosovës. Angazhimi i Trump për t’u kthyer te kjo temë është shpresëdhënës dhe i mirëpritur, sepse ne besojmë në lidership të qartë, në vendime të guximshme dhe në përkushtim ndaj paqes së qëndrueshme, ku Kosova trajtohet si e barabartë, jo si palë nën presion”, ka thënë Lekaj, njofton Klankosova.tv. Lekaj shtoi se një qasje e Presidenti Trump, me vendosmëri për t’i dhënë fund dialogut dhe për të garantuar njohjen e Kosovës nga Serbia është e mirëpritur. Derisa, ish-ministri i Jashtëm Enver Hoxhaj,e ka komentuar deklaratën e presidentit amerikan, Donald Trump se do t’i kthehet çështjes Kosovë-Serbi. Për Klankosova.tv, Hoxhaj tha se kjo deklaratë e presidentit të ShBA-së tregon që jemi në vëmendje të Trumpit dhe është një shenjë paralajmëruese se shpejt mund të jemi në agjendën e politikës së jashtme amerikane. “Kjo deklaratë e presidentit Trump as nuk duhet të mbiinterpretohet dhe as nënvlerësohet, ndonëse është thënë duke krahasuar marrëdhëniet Kosovë-Serbi me rastet e tjera në botë. Tregon që jemi në vëmendje të Trumpit dhe është një shenjë paralajmëruese se mund të jemi herët apo vonë, temë në agjendën e politikës së jashtme amerikane”, u shpreh Hoxhaj për Klankosova.tv. Tutje, ai tha se për këtë gjë, Kosova duhet të jetë e përgatitur si institucionalisht, ashtu edhe politikisht. https://klankosova.tv/trump-paralajmeron-rikthimin-ne-ceshtjen-kosove-serbi/