Zhvillimet në Lindjen e Mesme, rritet çmimi i naftës në Kosovë

Zhvillimet e fundit në Lindjen e Mesme, duket se kanë ndikuar edhe në tregun global të naftës e cila pritet të reflektojë edhe në çmim. Për pasojë, në Kosovë veçse kanë filluar të ngriten çmimet e këtij derivati. Kështu njoftoi përmes një shkrimi në Facebook, kryetari i Shoqatës së Naftëtarëve Fadil Berjani. Sipas tij, rritja pritet të jetë deri në 7 cent për litër, transmeton Klankosova.tv. “Situata gjeopolitike në Lindje të Mesme po ndikon drejtpërdrejt tregjet e naftës. Rritja e tensioneve dhe rreziku për ndërprerje në prodhim apo transport po shtojnë pasigurinë në furnizimin global, duke shtyrë çmimet e naftës më lart. Vëmendja është veçanërisht te Ngushtica e Hormuzit, një nga rrugët më të rëndësishme të kalimit të naftës në botë. Çdo problem në atë korridor reflektohet menjëherë në tregje dhe zakonisht përkthehet në kosto më të larta të karburantit për konsumatorët. Çmimet aktuale në kosovë janë Diesel : 1.18€ deri 1.25 € Benzin : 1.17 € deri 1.24€”, ka shkruar Berjani.