Zhegrova në "radarin" e Barcelonës këtë verë

Drejtori i futbollit i Barcelonës, Deco, ka disa mundësi për të përforcuar skuadrën këtë verë, por gjithçka do të varet nga buxheti që do të ketë në dispozicion. Duket se Barcelona është e interesuar të përforcojë sulmin dhe një mundësi interesante ka dalë në treg. Sipas raportimeve nga "Sport", Edon Zhegrova, anësori i Lille, ka vendosur të mos rinovojë kontratën me klubin francez, e cila skadon në vitin 2026. Për këtë arsye, ai do të vendoset në shitje këtë verë, për të mos kaluar si lojtar i lirë, dhe çmimi i tij fillestar do të jetë 30 milionë euro, megjithatë pritet që klubi të diskutojë për një ulje të çmimit. Zhegrova ka shprehur herë pas here dashurinë për Barcelonën dhe ka tërhequr vëmendjen e skautëve të klubit këtë sezon. Barcelona ka udhëtuar disa herë për të ndjekur ndeshjet e Lille, për shkak të interesit për portierin Lucas Chevalier dhe sulmuesin Jonathan David, dhe ka vënë re lojën e Zhegrovës, i cili luan në krahun e djathtë. Ai shkëlqeu me disa gola në Ligën e Kampionëve, përfshirë një të shënuar kundër Atletico Madrid në një fitore 3:1. Zhegrova është më i interesuar për të kaluar në La Liga ose Serie A, sesa në Premier League, dhe Napoli ka kontaktuar tashmë agjentët e tij, për të gjetur një zëvendësues për Khvicha Kvaratskhelia-n, pas kalimit të tij në PSG. Zhegrova është ofruar gjithashtu Barcelonës, e cila e vlerëson, por ende nuk ka bërë një hap konkret.