Zbulohen “shtëpitë e barit” në Malësi të Madhe, pesë persona në pranga

Policia ka zbuluar një tjetër rast të kultivimit të bimëve narkotike në ambiente të mbyllura me llamba, në fshatin Boriç i Madh. Me këtë rast, Policia e Shqipërisë ka bërë të ditur se shkuar në 13 numri i rasteve të evidentuara gjatë operacionit “Neonët”. Gjatë operacionit në Malësi të Madhe u arrestua në flagrancë një 35-vjeçar, ndërsa u shpall në kërkim një 36-vjeçar, të dyshuar se kishin përshtatur tri ambiente për kultivimin dhe tharjen e kanabisit, duke i furnizuar pajisjet me lidhje të paligjshme të energjisë elektrike. “Po ashtu, u ndaluan 4 punonjës të OSHEE-së dhe u procedua penalisht edhe një punonjës tjetër për veprën penale “Shpërdorimi i detyrës”. Të arrestuarit janë Kol Narkaj, Valentin Kuvendaj, Xhuljano Ceraj, Faik Muselaj, Fatmir Kajoshaj”. “Nga kontrollet, Policia sekuestroi 771 bimë të dyshuara narkotike kanabis, 6,2 gramë material bimor, si dhe pajisje të shumta elektrike, përfshirë 195 llamba, 21 aspiratorë dhe 20 filtra ajri, të përdorura për kultivimin e bimëve narkotike. Operacioni u zhvillua nga  Policia e Shkodrës, në bashkëpunim me Komisariatin e Policisë Malësi e Madhe dhe me mbështetjen e Forcave të Posaçme “Shqiponjat”.  Aktualisht vijon kapjen e personit në kërkim dhe për dokumentimin e plotë të kësaj veprimtarie kriminale”, ka njoftuar policia.