Ylber Asllanaj kujton Fahri Beqirin: I dashur, gazmor dhe profesionist

Brenda një jave u shuan dy ikona të muzikës kosovare. Komuniteti i artit muzikor dhe publiku humbën para një dite kompozitorin e shquar Fahri Beqiri dhe para gjashtë dite këngëtarin Ismet Bogujevci, njofton Klan Kosova. Këngëtari Ylber Asllanaj ka sjellë rrëfime për këta dy nga një këndvështrim më ndryshe se që i njohu publiku. “Profesori Fahri Beqiri është rritur jetim, prandaj mungesën e pjesëtarëve të ansamblit gjithmonë e ka ndie dhe ka arritur të jetë prind i dytë për ne. Njëra prej këshillave që nuk ia kemi dëgjuar shpesh ka qenë ajo për duhanin. Profa e ka urryer duhanin dhe jemi fshehë më shumë prej tij se prej prindërve tonë”. Asllanaj ka thënë se Beqiri ishte mbështetës i metodave jokonvencionale për të avancuar profesionin, ndryshe asaj tradicionales që është mësuar në shkolla. “Vërtet ai ka qenë i jashtëzakonshëm. Gjithmonë ka qenë sharmant dhe ka zgjuar buzëqeshjen dhe harenë. Gjithçka e ka bërë me pasion dhe me kureshtje. Ka pasë qejf të udhëtojë shumë dhe t’i shijojë ushqimet e atyre vendeve. I ka ditë krejt gjellëtoret e fshehta në qytet”. E përbashkët e Beqirit me Bogujevcin ishte edhe qetësia e tyre me kolegët dhe studentët. “Është dhimbje e madhe edhe humbja e Ismet Bogujevcit. Unë kam pasë fatin që t’i njoh të dy në të njëjtën kohë. Ka qenë nga personat më të dashur që kam njohur ndonjëherë. Kanë mjaftuar dy-tre minuta që ai të ta marrë zemrën”.