Lajmet e fundit
Presidenti i Hungarisë, Tamas Sulyok, e ka pritur sot homologun e tij kinez, Xi Jinping, në mjediset e Kështjellës spektakolare Buda të Budapestit të enjten në ndalesën e tretë dhe të fundit në turneun e parë evropian të Xi në pesë vjet.
Hungaria nën kryeministrin me prirje të djathtë Viktor Orban është bërë një partner i rëndësishëm tregtar dhe investimi për Kinën, në kontrast me disa vende të tjera të BE-së që po mendojnë të bëhen më pak të varura nga ekonomia e dytë më e madhe në botë.
Xi mbërriti në Budapest të mërkurën vonë pasi vizitoi Francën dhe Serbinë. Në Paris, presidenti Emmanuel Macron dhe shefja e Komisionit të BE-së, Ursula von der Leyen, i kërkuan atij të sigurojë tregti më të ekuilibruar me Evropën dhe të përdorë ndikimin e tij në Rusi për t'i dhënë fund luftës në Ukrainë.
Xi ka "zhvilluar miqësi të thella" me politikanët hungarezë dhe Hungaria ishte "objektivi numër një në rajonin e Evropës Qendrore Lindore për investimet kineze", shkroi Xi të mërkurën.
Xi është planifikuar të takohet me Orbanin më vonë gjatë ditës, ku pritet të flasë për luftën në Ukrainë dhe projektet e infrastrukturës kryesore. Një deklaratë për shtyp pritet në 15:30.
Hungaria dhe Kina, të cilat shënojnë 75-vjetorin e marrëdhënieve të tyre diplomatike, pritet gjithashtu të nënshkruajnë 16 deri në 18 marrëveshje të reja bashkëpunimi, njëra prej të cilave mund të jetë një projekt infrastrukturor në shkallë të gjerë në kuadër të projektit të madh të Kinës "Belt and Road", tha Ministri i Jashtëm Peter Szijjarto, shkruan Reuters, transmeton Klankosova.tv.
