Vuçiqi takohet me Varhelyin, e informon për situatën “shqetësuese në Kosovë”

Presidenti i Serbisë, Aleksandar Vuçiq, është takuar me komisionerin Evropian për Zgjerim, Oliver Varhelyi.

Vuçiq tha se Varhelyin e informoi për situatën, sipas tij, shqetësuese në Kosovë, teksa bëri të ditur se i kërkoi angazhim më aktiv të institucioneve evropiane për popullin serb.

“Ritheksova se Serbia në thelb dhe teknikisht është e gatshme për hapa të rinj në drejtim të afërsisë dhe anëtarësimit në BE, veçanërisht kur bëhet fjalë për sundimin e ligjit, integrimin ekonomik dhe social dhe falënderova Komisionin Evropian për mbështetjen gjatë rrugës”.

“Shfrytëzova rastin ta informoj komisionerin për situatën shqetësuese në Kosovë dhe kërkova angazhim më aktiv të institucioneve evropiane në mbrojtjen e të drejtave të popullit serb”, tha Vuçiq, transmeton Klankosova.tv.

Tutje, ai tha se e falënderoi Varhelyin për angazhimin dhe kontributin personal, që sipas tij, e ka dhënë në rrugën evropiane të Serbisë.