Vuçiqi pas takimit me Lammyn: Dialogu me Kosovën, kyç – s’duam asnjë konflikt në rajon

Sekretari i Jashtëm i Britanisë së Madhe, David Lammy, pas vizitës së tij në Kosovë, ka vazhduar rrugëtimin e tij për në shtetin fqinj, Serbinë. Atje, Lammy është takuar me presidentin serb, Alleksandar Vuçiq. Ky i fundit ka thënë se me ministrin britanik ka folur edhe për Kosovën, teksa është shprehur se vendi i tij “nuk do asnjë konflikt” në rajon. “Pavarësisht dallimeve tona rreth Kosovës, ne besojmë se dialogu është i një rëndësie kyçe dhe se problemet duhet të zgjidhen me bisedime”, ka thënë Vuçiqi pas takimit me Lammyn, sipas "Euronews Serbia", transmeton Klankosova.tv. Presidenti serb tha se me ministrin britanik kanë diskutuar edhe çështjet tjera rajonale, si dhe situatën në Bosnje dhe Hercegovinë. Ai citohet të ketë thënë se Serbia gjithmonë do ta respektojë Marrëveshjen e Dejtonit dhe se vendi i tij nuk “do asnjë konflikt”. “Serbia dëshiron rritje të shpejtë ekonomike dhe kjo është gjëja më e rëndësishme për ne”, ka thënë Vuçiqi. Sekretari i Jashtëm britanik, gjatë takimeve të tij në Kosovë, ka dërguar mesazhin e vendit të tij se qeveria e re e Kosovës duhet të angazhohet seriozisht në dialogun me Serbinë. /Klankosova.tv