Lajmet e fundit
Hemorroidet janë zgjerime të venave të pjesës fundore të zorrës së trashë, pranë anusit. Vitet e fundit, rastet e të sëmurëve me hemorroide janë të shumta dhe prandaj i kushtohet një vëmendje e madhe informimit të publikut të gjerë në mënyrë që të krijojë kushte për parandalimin, apo mjekimin e tyre. Asnjëherë mos i konsideroni si një problem shëndetësor që zhduket vetë, apo si diçka e parëndësishme. Hemorroidet krijojnë stazë të gjakut në venat pranë anusit dhe rrisin rrezikun për zhvillimin e trombozave, të cilat shoqërohen me dhimbje, edema, dhe më e rëndësishmja, me hemorragji. Hemorragjitë e shpeshta çojnë në anemi, si dhe në probleme me tensionin, pasi humbja e një sasie të madhe gjaku, çon në ulje të tensionit.
Shkaqet e formimit të hemorroideve janë të shumta, si shkaqet gjenetike, apo shpeshtësia e kapsllëkut etj. Duke qenë se shkaqet gjenetike nuk mund të ndryshohen dot, rekomandohet që çdo person të kujdeset për kapsllëkun duke dalë jashtë çdo ditë dhe duke marrë ushqimet e duhura për parandalimin e tij.
Përpara se të kalohet tek laksativët për kurimin e kapsllëkut, apo barnave vazokontriktore për mjekimin e hemorroideve, është e rëndësishme të merrni fillimisht masa për rregullimin e dietës suaj ushqimore, pasi edhe dieta ka një rol të madh në kurimin natyral të hemorroideve. Këshillohet që i sëmuri me hemorroide të hajë bukë të zezë në vend të bukës së bardhë, të pijë shumë lëngje, si dhe të bëjë ushtrime fizike. Rekomandohet nga mjekët popullorë edhe përdorimi i një bime të quajtur Fenugreek, nga e cila duhen marrë tri lugë të mëdha dhe të vlohen me një litër ujë. Pastaj e filtron dhe e shton në një legen me ujë të ngrohtë, ku duhet të qëndrosh për 10 minuta, dy herë në ditë, në mëngjes dhe në mbrëmje. Mund të përdoret edhe këllëfi i patëllxhanit, mbështjellësja jeshile e tij, i cili duhet të skuqet, të thahet, të bluhet dhe me pluhurin e tij të lyesh fundin e zorrës së trashë, atje ku e ndjeni praninë e hemorroideve.
