Lajmet e fundit
Gjykata Themelore në Prishtinë – Departamenti Special ka caktuar masën e paraburgimit prej një muaji për të dyshuarin serb M.M nën dyshimin për vrasjen e Oliver Ivanoviqit.
Në kumtesën e Gjykatës bëhet e ditur se ekziston dyshimi i bazuar se M.M ka kryer veprën penale “Pjesëmarrje ose organizimi i grupit kriminal të organizuar” dhe “Vrasje e Rëndë”, njofton Klankosova.tv.
“Me rastin e caktimit të paraburgimit, Gjykata vlerësoi se ekzistojnë arsyet ligjore për caktimin e masës së paraburgimit ngase ekziston dyshimi i bazuar se i pandehuri M.M po të gjendet në liri mund të arratiset dhe t’i shmanget organeve ndjekëse, ku lënia në liri e të pandehurit paraqet rrezik real se i njëjti mund të shmanget nga ndjekja penale, duke konsideruar se deri në momentin e ndalimit ka qenë në arrati, po ashtu po të gjinden i pandehuri në liri ekziston rreziku se i njëjti do të pengojnë zhvillimin e suksesshëm te hetimeve, duke ndikuar në të dëmtuarit dhe dëshmitarë, prandaj për zhvillimin e pa penguar te hetimeve është i nevojshëm caktimi i masës së paraburgimit” thuhet në njoftim.
Kundër këtij aktvendimi, palët e pakënaqura kanë të drejtë ankese në Gjykatën e Apelit.
