Mbrëmjen e së enjtes, një ngjarje e rëndë kriminale është regjistruar në fshatin Gjashtë të Sarandës në Shqipëri, ku një konflikt i përshkallëzuar me armë zjarri i ka marrë jetën 66-vjeçarit Rexhep Ismaili, pronar i një karburanti në zonë dhe njëkohësisht kryetar i Shoqatës Çamëria në Sarandë.
Sipas të dhënave paraprake, ngjarja ka ndodhur rreth orës 21:30 në lokalin e karburantit “Vëllezërit Ismaili sh.p.k.”. Fillimisht mes disa personave ka pasur konflikt me sende të forta për motive që ende nuk janë zbardhur, ndërsa më pas situata është përshkallëzuar në përdorimin e armëve të zjarrit.
Burime nga vendngjarja bëjnë me dije se Rexhep Ismaili ka qenë në tavolinë me disa persona të tjerë në momentin kur autori i dyshuar, Lulzim Tabaku, ka nxjerrë armën dhe e ka qëlluar me një plumb në kokë, duke i shkaktuar vdekjen në vend.
Pas të shtënave, personat që ndodheshin në tavolinë me viktimën dyshohet se janë kundërpërgjigjur me armë zjarri. Nga shkëmbimi i zjarrit dyshohet se ka mbetur i plagosur edhe një person tjetër, ende i paidentifikuar, i cili nuk është paraqitur për ndihmë mjekësore, raporton
A2CNN, transmeton Klankosova.tv.
Menjëherë pas ngjarjes, autori i dyshuar është larguar nga vendi i krimit bashkë me personat e tjerë të përfshirë dhe me të plagosurin.
Në reagimin zyrtar, policia konfirmoi se autori i dyshuar është identifikuar si Lulzim Tabaku, ndërsa janë ngritur pika kontrolli dhe po vijojnë kontrollet intensive në zonë për kapjen e tij.
Ndërkohë, grupi hetimor ka sekuestruar kamerat e sigurisë së biznesit dhe të zonës përreth, me qëllim zbardhjen e plotë të dinamikës së ngjarjes dhe identifikimin e të gjithë personave të përfshirë.
Policia po ushtron gjithashtu kontrolle në spitalet rajonale dhe klinikat private për lokalizimin e personit të plagosur, ndërsa hetimet vijojnë nën drejtimin e Prokurorisë.
https://klankosova.tv/biznesmeni-vritet-me-plumb-ne-koke-zbardhet-dinamika-e-krimit-ne-sarande/
●●●
SZSHKRIMI NGA
Sh Z
Editorial nga Klan Kosova — ndjek lajme dhe zhvillimet e tjera kryesore të vendit.
