Vonesë 40-minutëshe në Hagë, mbrojtja e Krasniqit gati - kundërpërgjigjet edhe ZPS

Gjyqi i madh në Hagë kundër katërshes së Ushtrisë Çlirimtare të Kosovës, do të vazhdojë sot, por seanca nuk do të fillojë siç ishte përcaktuar. Gazetarja e Klan Kosovës, Rina Mujku, e cila ndodhet atje, ku po e përcjellë këtë proces që nga java e kaluar është në fazën e fjalëve përfundimtare, ka treguar se sesioni i sotëm nis me 40 minuta vonesë për arsye teknike. Kjo ditë pritet të jetë mjaft e ngjeshur, pasi fillimisht do të vazhdojë mbrojtja e Jakup Krasniqit, për pjesën tjetër të kundërshtimeve ndaj pretendimeve të ZPS-së, pasi të premten u krye veç një pjesë. Ndërsa pjesa e pasdites do të jetë e dedikuar për kundërpërgjigjet e Prokurorisë së Specializuar ndaj mbrojtjes dhe pyetjet e trupit gjykues. “Furtuna Sheremeti nuk do të jetë avokatja e vetme shqiptare, zëri i së cilës do të dëgjohet në fjalët përmbyllëse këtu në Dhomat e Specializuara të Kosovës. Është e rëndësishme që edhe një avokat tjetër do të flasë në këtë proces gjyqësor, sepse gjatë ditës së [sotme] avokati tjetër, Mentor Beqiri, do të marrë fjalën. Ai do flasë për mënyrën e krijimit të UÇK-së, zakonet dhe të drejtën zakonore të shqiptarëve për mbrojtjen e shtëpisë dhe tokës, si dhe arsyet që çuan në krijimin e guerilës me synim mbrojtjen e vendit dhe luftën për liri e pavarësi”, tha Mujku. /Klankosova.tv