Vitrinat për promovimin e artistëve zbukurohen me pikturat e Hekuran Sokolit

Në vitrinat për promovimin e artistëve të rinj janë duke u ekspozuar veprat e piktorit Hekuran Sokoli. Të enjten, 14 punime të stilit të abstraksionit gjeometrik u vendosën në “Raiffeisen Gallery” – hapësirë kjo e bankës që mbështet artin, raporton Klan Kosova. Ekspozita është shitëse dhe veprave u janë vendosur çmime më të lira për festat e fundvitit. Kështu ka bërë të ditur vetë artisti përmes një shkrimi në Facebook. “Duke pasur parasysh që po i afrohemi fundit të vitit (kohës së dhuratave), ato janë në shitje me çmime më të lira se zakonisht”, ka shkruar Sokoli. Ekspozita që ndodhet në katin e parë të qendrës tregtare “Albi Mall” në Prishtinë, do të qëndrojë e hapur deri në fund të muajit nëntor. Kjo është ekspozita e tretë personale e artistit. Gjatë verës së këtij viti, Sokoli e ka hapur ekspozitën e tij të dytë “Copat e Mia të Thyera” në Shkodër të Shqipërisë, ndërsa të parën “Rrugëtimi Astral” në hollin e Bibliotekës Kombëtare në vitin 2021. Artisti thotë se përmes abstraksionit gjeometrik arrin që ta shprehë të njohurën dhe të panjohurën që ka brenda vetes së tij. “Në një botë ku pritshmëritë në lidhje me njerëzimin janë gjithnjë në rritje, unë mund të bëj disa gjëra për të siguruar jetesën. Megjithatë, unë kënaqem me atë që është më e pasigurt dhe fëmijërore. Kjo sepse vetëm në art e gjej shprehjen e plotë. Vetëm në art mund të bashkoj njohuritë dhe përvojën time me imagjinatën time dhe të krijoj diçka të papenguar. Në të gjej strehë, intelekt, krijimtari, gëzim, luftë, punë të palodhur, disiplinë, argëtim, individualizëm, sfidë, shërim, pranim dhe mbi të gjitha liri”, thotë artisti në deklaratën e tij. “Të gjitha këto i manifestoj përmes formave gjeometrike sepse kjo është mënyra ime më e mirë e të shprehurit. Përmes artit gjeometrik arrij të shpreh të njohurën dhe të panjohurën që kam brenda vetes”, deklaroi Sokoli.