Virusi HMPV qarkullon prej 25 vitesh në Shqipëri?!

Metapneumovirusi, që ka krijuar shqetësim në Kinë dhe ka bërë vigjilente pjesën tjetër të botës, nuk është i panjohur për mjekët as për popullatën në mbarë globin. Mund të ketë ndodhur që të gjithë të jenë prekur të paktën një herë prej tij në Shqipëri, pasi ky virus thuhet ka më shumë se 25 vjet që qarkullon atje së bashku me gripin dhe virozat e tjera respiratore, transmeton klankosova.tv. Instituti i Shëndetit Publik në Shqipëri deklaron se atje, nuk ka shpërthime epidemiologjike nga Human Metapneumovirusi dhe as raste të rënda në spital. Epidemiologu Dritan Ulqinaku, ish-nëndrejtor në Institutin e Shëndetit Publik shqiptar, shuan zërat dhe dyshimet për shfaqjen e një pandemie të dytë, pas asaj të Covid-19. https://www.youtube.com/watch?v=9DG5Q3mcEmQ Sipas a2cnn, ekspertët e ISHP tregojnë se edhe Human Metapneumovirusi transmetohet përmes rrugëve aerogene, njësoj si gripi dhe Covid-19. Edhe shenjat e sëmundjes nisin njësoj, por metapneumovirusi kryesisht përqendrohet në bronke, duke shkaktuar bronkiolite deri në pneumoni. Metapneumovirusi prek dhe dëmton më së shumti shëndetin e të miturve dhe të moshuarve. Për këtë grup-mosha, ISHPSH, këshillon kujdes më të shtuar, madje dhe mbajtjen e maskës në vendet ku ka më shumë njerëz.