Vikendi sjell dy derbi fantastikë në Superligën e basketbollit

Rivalët e moçëm në basketbollin e Kosovës, ndeshen mes vete këtë të shtunë. Sigal Prishtina është nikoqire e Pejës, në duelin që e hap xhiron e pestë në Procredit Superligën e Kosovës në basketboll. Kjo përballje fillon nga ora 17:00 dhe transmetohet direkt në Klan Kosova dhe Sport 1 të platformës kryesore në vend, Art Motion, ku komentator i kësaj super-klasike është Agon Fehmiu. Kryeqytetasit kanë vetëm një humbje deri tani, krahas tri fitoreve, kurse Peja ka triumfuar në dy raste, e aq herë edhe ka humbur, raporton Klankosova.tv. Në po të njejtën ditë, në K-sport vjen dueli ndërmjet Borës dhe Vëllaznimit. Edhe e diela nis me një derbi të zjarrtë. Në palestren "13 Qershori" në Suharekë, Golden Eagle Ylli e pret Bashkimin. Këta të fundit që kur ka filluar edicioni i ri i garave, nuk njohin humbje, karahas vendasëve që në katër ndeshjet e para kanë fituar dhe humbur nga dy sosh. Java e pestë në elitën e basketbollit mbyllet në "Sezair Surroi", ku Proton Cable Prizreni i pret kampionët aktual, Trepçën.