"Vetëm pafajësia do të jetë vendimi i drejtë", thotë Lladrovci për ish-krerët e UÇK-së në Hagë

Kryetari i Drenasit, Ramiz Lladrovci është deklaruar pas fjalës përfundimtare të katërshes së UÇK-së, Hashim Thaçit, Kadri Veselit, Rexhep Selimit dhe Jakup Krasniqit. gjatë ditës së sotme para Gjykatës Speciale në Hagë. Lladrovci në një postim në llogarinë e tij në Facebook ka shkruar se “vetëm pafajësia për heronjtë tanë të luftës dhe paqes, do të jetë vendimi i drejtë”. “Lirimi i plotë nga akuzat e shpifura ndaj Hashim Thaçit, Kadri Veselit, Jakup Krasniqit dhe Rexhep Selimit, është fat i pandashëm nga Kosova, nga vlerat e saj themelore, aleancat strategjike dhe rruga jonë euro-atlantike”. “Vlera sublime e Kosovës është UÇK-ja me dëshmorët, martirët, invalidët, veteranët dhe qytetarët e lirë. Për lirinë e Kosovës dhamë krejt çka patëm, punuam sa ditëm dhe sot e gëzojmë atë pa dallim. Liri për heronjtë tanë të luftës dhe paqes! Lavdi Ushtrisë Çlirimtare të Kosovës! Lavdi dëshmorëve dhe martirëve të kombit!”, shkroi ai, transmeton Klankosova.tv