Veseli në hapjen e Pavijonit të Kosovës në Venedik: Kosova po ecë përpara

Kryetari i Kuvendit të Kosovës, Kadri Veseli ka përshëndetur hapjen e Pavijonit të Kosovës në Bienalen e Venedikut. Veseli derisa mori pjesë në edicionin e 16-të të Ekspozitës Ndërkombëtare të Arkitekturës së Bienales, ka theksuar se artistja Eliza Hoxha arriti të bartë një pafundësi të shpresave dhe të hapësirës në të njëjtën kohë shfaqi mundësitë dhe ambiciet e kombit shqiptar, njofton Klan Kosova. ''Kosova po ecë përpara. Kosova nuk është më e kufizuar'', deklaroi ai duke iu referuar kufizimit të cilin përjetuan shqiptarët e Kosovës përgjatë të ‘90-tave. Ndërsa vet Kuratorja e Pavijonit të Kosovës, Eliza Hoxha theksoi se Pavijoni i Kosovës është një shtëpi e cila përbrendësoi funksionet publike duke e kompensuar qytetin. ''Ato vite sjellin në pah solidaritetin, mobilizimin dhe aktivizmin e përgjithshëm kolektiv në ëndrrën për Kosovën si hapësirë e lirë'', ka thënë ajo në ceremoninë e hapjes së këtij pavioni, njofton Klan Kosova. Për më tepër Pavijoni i Kosovës u nderua edhe nga prezenca e Presidentit të Bienales së Venedikut, Paolo Barrata.