Veseli letër parlamenteve mike si kundërpërgjigje ndaj tendencës së Serbisë për t'i mohuar krimet në Kosovë

Kryetari i Kuvendit të Kosovës, Kadri Veseli, ka thënë se me rastin e 20 vjetorit të luftës së Kosovës dhe për shkak të tendencës së Serbisë për t'i mohuar krimet që ka bërë, ka përgatitur një letër që do t'ua drejtojë parlamenteve të shteteve mike. Veseli thotë se nga këto shtete do të kërkojë hartimin e rezolutave që në mënyrë zyrtare njohin rolin e shtetit serb si shkaktar të krimeve kundër njerëzimit. “Kosova nuk do të heshtë ndaj përpjekjeve të Serbisë për ta rishkruar historinë e luftës dhe masakrave që ka kryer në Kosovë”. “Me rastin e 20 vjetorit të luftës së Kosovës dhe duke pasur parasysh tendencën e qeverisë së Serbisë për të mohuar krimet e bëra, kam përgatitur një letër drejtuar Parlamenteve të vendeve mike për të kërkuar prej tyre hartimin e rezolutave që në mënyrë zyrtare njohin rolin e shtetit serb si shkaktar të krimeve kundër njerëzimit”. “Një rezolutë e tillë do të përkujtonte ngjarjet e dhimbshme për popullin tonë, do të nderonte viktimat e shumta civile dhe do të dënonte kategorikisht çdo përpjekje për ta mohuar apo ndryshuar atë pjesë të errët dhe të dhimbshme të historisë bashkëkohore evropiane”. “Të tilla rezoluta përkujtuese, jo vetëm ndërgjegjësojnë shoqërinë që krimet çnjerëzore si ato të luftës së Kosovës mos të përsëriten më, por i kontribuojnë edhe pajtimit ndëretnik i cili është i pamundur nëse nuk thuhet e vërteta”, ka shkruar Veseli në Facebook.