Lajmet e fundit
Gazetarja e Klan Kosovës, Endrita Bajrami, ka dhënë detaje të reja lidhur me rastin tragjik të ndodhur mbrëmë në Gadime të Lipjanit, ku nxënësi i shkollës “Zenel Hajdini”, Zejn Zejnhullahu humbi jetën pasi ra në lumë.
Gazetarja ka intervistuar qytetarin që nxori nga lumi Zejnin e ndjerë, Petrit Danqi, i cili ka konfirmuar se në momentin kur kanë dalë nga uji, vogëlushi ka pasur ende puls, transmeton Klankosova.tv.
Siç thekson Bajrami, Danqi kishte thënë se mbrëmë niveli i ujit të lumit ishte rritur, si pasojë e vërshimeve.
Po ashtu, ajo ka intervistuar edhe drejtorin e shkollës ku ka vijuar mësimet i ndjeri, Skender Ademi, i cili ka deklaruar se Zejni kur ka dalë nga shkolla nuk kishte përdorur rrugën e zakonshme për në shtëpi, por e ka ndryshuar atë.
“Si të gjithë, ai ka dalë nga klasa me të gjithë shokët e tij. Ai ka qenë me një vajzë me të cilën janë afër me shtëpi, dhe janë drejtuar për në shtëpi bashkë. Kur janë afruar afër një lagjeje të Limanëve, papritmas prindi i kësaj vajze, pra shoqes së tij, e merr vajzën dhe i bën një kërkesë që edhe Zejnën ta merrte me vete. Por ai me këmbëngulje ka thënë se “nuk dua të vi dhe se dua të shkoj ta blej një kifle e ta vazhdoj rrugën”. Nuk ka pranuar assesi dhe ka vazhduar rrugën vetë. Ka zgjedhur një rrugë më të shkurtër e me probleme dhe papritmas ka rënë në lum”, tha drejtori.
Gazetarja ka vizituar edhe familjen e Zejnit të vogël, ku bëri të ditur se të njëjtit janë në gjendje të rënduar emocionale.
Sipas Bajramit, nesër do t’i jepet lamtumira e fundit të miturit.
