Vepra e kompozitorit kosovar, premierë në shenjtërimin e Nënës Terezë

Vepra e kompozitorit kosovar Kreshnik Aliçkaj, do të interpretohet me 3 shtator, ditën e shenjtërimit të Nënës Terezë në Vatikan. Vepra e kompozitorit të njohur kosovar Kreshnik Aliçkaj, është njëra nga veprat Premierë që do të interpretohet me 3 shtator 2016 në Vatikan në shenjtërimin e Nënës Terezë. “Kjo vepër është shkruar enkas për këtë ngjarje dhe është porositur  nga dirigjenti i mirënjohur Bujar Llapaj i cili po ashtu do të dirigjojë këtë vepër. Vepra është e shkruar për soprano, lahutë, kor dhe orkestër simfonike”, ka thënë Aliçkaj. Vepra do të interpretohet nga Kori dhe Orkestra e Filarmonisë së Kosovës, kurse solistë do të jenë Elbenita Kajtazi, soprano dhe Sherif Kurti, lahutë, ndërsa teksti është shkruar nga Remzi Limani.