Vepra e dedikuar për Luftën e Kosovës kryeson top-listën më të madhe botërore të muzikës klasike

Një vepër muzikore e dedikuar për viktimat e luftës në Kosovë ka kryesuar anketën më të madhe vjetore në botë për muzikën klasike. “The Armed Man: A Mass for Peace”, nga kompozitori uellsian Karl Jenkins, është votuar si vepra më e pëlqyer në “Classic FM Hall of Fame 2026”, raporton BBC, transmeton Klankosova.tv. Gati 90,000 vota nga publiku u hodhën në renditjen e këtij viti, ndërsa vendi i parë u shpall të hënën nga prezantuesi Dan Walker. Sir Karl, i lindur dhe rritur në Penclawdd, Swansea, tha se ishte “kënaqësi” të ishte kompozitori i parë i gjallë që arrin vendin e parë. Duke folur për BBC Radio Wales, ai u shpreh: “Ndihem mirë që jam gjallë dhe marr çmimin, në vend që të jem i vdekur dhe ta marr atë. Është e çuditshme që është kështu”. E dedikuar për viktimat e Luftës së Kosovës, vepra korale e vitit 2000 e 82-vjeçarit reflekton mbi shkatërrimin e konfliktit, duke shprehur njëkohësisht shpresë për paqe. “Në sfondin e zhvillimeve aktuale botërore, mesazhi i saj mbetet jashtëzakonisht i rëndësishëm, duke theksuar temat e qëndrueshme të paqes dhe shpresës për të ardhmen”, tha “Classic FM”. Kjo është gjithashtu vepra e parë korale që zë vendin e parë që nga fillimi i anketës në vitin 1996. Kompozitori kishte edhe katër vepra të tjera në renditjen e këtij viti – “Adiemus” (vendi 66), “Palladio” (82), “Gloria” (191) dhe “Requiem” (300). “The Armed Man” u porosit fillimisht në vitin 1998 nga organizata të ndryshme si një meshë për të shënuar mijëvjeçarin, tha Sir Karl, duke shtuar se që nga viti 2000 është interpretuar “globalisht” 4,000 herë. “Është një narrativë e konfliktit dhe luftës”, tha ai. “Fillon me paqen dhe përgatitjen për luftë dhe konflikt, reflektimin pas kësaj, dhe më pas shpresën për një të ardhme më të mirë”. “Por kjo, natyrisht, nuk ndodhi kurrë. Dhe ja ku jemi 25 vjet më vonë në mes të gjithë kësaj rrëmuje globale, kështu që kjo ishte njëra anë”. “Ana tjetër është se më pëlqen të mendoj se ka një arsye, që muzika pëlqehet dhe është e paharrueshme”, u shpreh ai, transmeton Klankosova.tv. Gjatë viteve, Sir Karl tha se shumë njerëz i kanë treguar se si kjo vepër i ka ndihmuar në periudha të vështira. “Mesazhi është po aq i rëndësishëm sot sa ishte 25 vjet më parë”, tha ai. “Ka prekur shumë njerëz”. “Marr shumë mesazhe nga njerëz që janë të sëmurë dhe që po vdesin, njerëz me trauma në jetën e tyre, të cilët më kanë treguar për mbështetjen që u ka dhënë kjo muzikë”. Anketa e këtij viti nxori gjithashtu në pah ndikimin në rritje të muzikës së filmave, me një rekord prej 40 veprash, sipas “Classic FM”. Pavarësisht suksesit historik të Jenkins, Wolfgang Amadeus Mozart mbetet kompozitori më i përfaqësuar në total, me 12 vepra në listë. Sir Karl tha se është i vetëdijshëm për “gjigantët” e muzikës pranë tij. Ai shtoi: “Sondazhi është një sondazh popullariteti dhe as që po e mendoj faktin që janë gjithë këta gjeni pas meje në listë, nga Mozart te Beethoven dhe madje edhe John Williams. Në këtë kuptim, është kënaqësi”. /Klankosova.tv https://youtu.be/Oc8bc-bA1JM?list=PL292A2AE7B9FD983A