Vendimi për dinarin, Kurti: Rregullorja e BQK-së në përputhje me Kushtetutën dhe ligjin

Kryeministri i vendit, Albin Kurti, ka bërë sot homazhe te varri i heroit Zahir Pajaziti, në Kompleksin Memorial në Orllan të Podujevës. Në një prononcim para gazetarëve, ai ka folur edhe rreth vendimin e fundit të Bankës Qendrore të Kosovës, përmes të cilit ka ndalur përdorimin e dinarit serb në territorin e Kosovës, raporton Klan Kosova. Sipas tij, vendimet dhe rregullat që BQK-ja ka miratuar janë krejtësisht në përputhje me Kushtetutën dhe ligjet e Kosovës. Tutje, ai ka kërkuar që të mos i bëhet presion BQK-së dhe guvernatorit Ahmet Ismaili. “Vendimet e BQK-së janë vendime të pavarura sepse BQK-ja është institucion i pavarur. Rregullat të cilat ata i sjellin, rregulloret që ata i miratojnë janë krejtësisht në përputhje me Kushtetutën dhe ligjin dhe unë besoj që duhet ta lëmë të qetë BQK-në dhe guvernatorin Ahmet Ismaili që ta bëjë punën e tij ashtu siç e ka fituar besimin në Kuvendin e Kosovës”, është shprehur Kurti.