Vdes ikona e punkut dhe modës, Vivienne Westwood

Pas lajmit për vdekjen e dizajneres së njohur të modës, Vivienne Westwood, kanë filluar menjëherë edhe homazhet për të nga figura të modës dhe miqtë. “Vivienne Westwood vdiq qetë dhe e rrethuar nga familja e saj në Londër”, njoftoi shtëpia e saj e modës përmes deklaratës publike në rrjetet sociale. Ajo u bë emër i njohër me stilet e punk-ut kontravers dhe new wave në vitet e ‘70ta dhe kreacionet e saj i veshën shumë nga yjet e mëdha të modës. Dizajneri i modës Marc Jacobs shkroi në Instagram se ‘ajo asnjëherë nuk dështoi për të befasuar me punën e saj’. Kurse, modelja Bella Hadid, e cila u paraqit në pasarelën e fundit gjatë Javës së Modës në Paris në tetor, e përshkroi si ‘diell’ në indushtrinë e modës dhe se është mirënjohëse që ka qenë në orbitën e saj. Pas njoftimit, bashkëshorti dhe partneri kreativ i “Westwood”, Andreas Kronthaler tha: “Do të vazhdoj me Vivienne në zemrën time”. "Ne kemi punuar deri në fund dhe ajo më ka dhënë shumë gjëra për të vazhduar". Westwood u bë e njohur me modelet e saj androgjene, bluzat me slogane dhe qëndrimin e pandershëm ndaj pushtetit. Ajo njihej gjithashtu si një aktiviste e vendosur dhe solli në pasarelë kauza, për të cilat ajo i mbronte, si ndryshimet klimatike, shkruan BBC, përcjell Klankosova.tv. Ajo mori titullin ‘Dame’ për shërbimet ndaj modës në vitin 2006. Westwood, e lindur në Derbyshire, punoi si mësuese e shkollës fillore, përpara se të krijonte një dyqan veshjesh ‘Let It Rock’ në King's Road në Chelsea me partnerin e saj të atëhershëm, Malcolm McLaren në fillim të viteve ‘70. Biznisi më vonë u riemërua “Sex and McLaren” filloi të menaxhonte bendin punk “Sex Pistols”, të cilët fituan famë në vitin 1976 duke veshur rrobat e Westwood dhe McLaren. Kurse, këngëtari Boy George, i cili u takua për herë të parë me Westwood në fillim të viteve 1980, e quajti atë "të shkëlqyer dhe frymëzuese" dhe "pa diskutim... Mbretëresha e padiskutueshme e modës britaneze". Dizajnerja e modës dhe ish-anëtarja e grupit pop “Spice Girls”, Victoria Beckham tha se ajo ishte një "dizajnere dhe aktiviste legjendare". Supermodelja Claudia Schiffer shkroi se "zëri unik i Westwood do të jetë i pazëvendësueshëm dhe do të mungojë", ndërsa këngëtari Billy Idol - i cili gjeti famë në skenën e muzikës punk londineze - shkroi në Twitter: "RIP do të më duhet pak për ta pranuar ikjen tënde ...". Muzeu “Victoria and Albert”, i cili strehon disa nga veprat e saj, e përshkroi Westwood si një "forcë të vërtetë revolucionare dhe rebele në modë".