Vdes Frank Auerbach, piktori hebre që u shpëtoi nazistëve

Piktori Frank Auerbach, një nga figurat më të shquara të artit figurativ pas Luftës së Dytë Botërore, ka vdekur në moshën 93-vjeçare. Ai vdiq në shtëpinë e tij në Londër të hënën, më 11 nëntor 2024, pas një karriere të gjatë dhe të pasur në art, shkruan The Guardian. Auerbach, i cili ishte një refugjat hebre nga Gjermania që arriti në Britani gjatë Luftës së Dytë Botërore, u bë një nga piktorët më të rëndësishëm të brezit të tij, duke lënë pas një trashëgimi të pasur me portrete dhe skena nga jeta e përditshme në Londrën e pasluftës. Studioja e tij, e vendosur në Camden Town, u bë një simbol i kërkimit të tij të përhershëm për shprehje dhe kuptim përmes pikturës, vijon teksti i The Guardian. I njohur për teknikën e tij të veçantë, Auerbachi shpesh përpunonte tablotë e tij duke hequr dhe riparuar shtresa të shumta boje, duke arritur të krijonte kompozicione të dendura dhe ekspresive, të cilat shpesh dukeshin si një “shpërthim” emocionesh dhe ngjyrash. Ai shpesh thoshte se 95 për qind e bojës që përdorte përfundonte në koshin e plehrave, pasi ai kërkonte një mënyrë të re për të shprehur diçka të papritur në punën e tij. Auerbach ka pasur një lidhje të veçantë me disa modele dhe miq të tij, përfshirë gruan e tij, piktoren Julia Wolstenholme, dhe modelin Juliet Yardley Mills, të cilët janë paraqitur në disa nga punët më të njohura të tij. Ai u bë pjesë e shoqërisë artistike në Soho, ku u miqësua me artistë të njohur si Francis Bacon dhe Lucian Freud. Karriera e tij mori një rrjedhë të suksesshme në vitet 1970, kur ai u bë subjekt i një retrospektive të madhe në Hayward Gallery dhe përfaqësoi Britaninë në Bienalen e Venecias në vitin 1986, ku ndau Çmimin e Luanit të Artë me artistin gjerman Sigmar Polke./The Guardian