Lajmet e fundit
“Kur u zgjova nuk e dija që jam në Kinë”.
Janë këto fjalët e Lan e cila kujton natën që ia ndryshoi jetën.
Përderisa po përgatitej për Universitet në kufirin në veri të Vietnamit, ajo takoi një mike në rrjete sociale e cila e ftoi për darkë me miqtë e tjerë. Kur ajo ishte e lodhur dhe dëshironte të kthehej në shtëpi, ata i kërkuan asaj që të qëndronte që të pinin edhe pak.
Kjo është gjëja që mban mend.
Gjëja tjetër që di është se kur u zgjua e kuptoi që ishte kontrabantuar për në Kinë.
“Në atë kohë, dëshiroja të ikja. Kishte edhe vajza të tjera në veturë, por kishte persona që na ruanin”, u shpreh Lan.
Fshatrat në mes të kufirit vietnamezo - kinez janë shumë të njohura për trafikimin me njerëz.
Vajzat e reja, mashtrohen dhe drogohen e më pas kontrabondohen me anije, motoçikletë ose veturë.
Këto vajza vietnameze cilësohen si “mall i vlefshëm” në Kinë, ku politika shumëvjeçare për të bërë vetëm një fëmijë ka rritur preferencat e prindërve për meshkuj, kështu duke e ulur propocionin mes meshkujve dhe femrave.
Gocat e reja nga Vietnami kontrabandohen për në Kinë për t’u shitur si nuse.
“Një mashkulli kinez i kushton shumë që të martohet me një grua kineze”, u shpreh Ha Thi Van Khanh, koordinatorja e OKB-së kundër trafikimit me njerëz në Vietnam.
Tradicionalisht meshkujt kinez nëse dëshirojnë që të martohen me femrat nga Kina atëherë detyrohen të paguajnë për një banket dhe me patjetër duhet ta kenë një shtëpi të re ku do të mund të jetojnë si çift pas dasmës.
“Kjo është arsye pse ata dëshirojnë t’i importojnë gratë nga vendet fqinje, përfshirë këtu edhe Vietnamin”.
Diep Vuong, kishte filluar Fondacionin Lidhjet e Pacifikut, për të luftuar trafikimin në Vietnam.
Ajo tregon se nuset vietnameze shiten në tregun kinez 3 mijë e më shumë dollarë, pasi që janë shumë të kërkuara në Kinë për shkak të ngjajshmërive kulturore që kanë këto dy vende.
Nguyen – Historia e të trafikuarës që u detyrua të martohet me të panjohur
Një prej të trafikuarave është edhe Nguyen e cila ishte vetëm 16 vjeçare kur i dashuri i shoqes së saj e kishte droguar për të kontrabanduar më pas në Kinë.
Ajo tregon se kishte tentuar që t’i rezistonte martesës. Për tre muaj, ajo kishte refuzuar madje kishte duruar edhe rrahjet e trafikantit, e kishte duruar urinë e edhe kërcënimet e trafikantit që do ta vriste nëse vazhdonte të sillej kështu.
Në fund, ajo u detyrua t’i dëgjojë urdhrat e ‘shefit’ të saj dhe u martua.
Nguyen shprehet se burri i saj ishte sjellë shumë mirë me të, por asaj gjithmonë i ka munguar familja në Vietnam.
“Dëshira ime për të shkuar në shtëpi është e papërshkrueshme. Unë u pajtova të martohem, por nuk mund të rrija tërë jetën me një të panjohur për të cilin nuk kam asnjë ndjenjë”, u shpreh Nguyen.
Kur ish vjehrra e saj e kuptoi që ajo nuk po e kënaqte burrin e saj, atëherë e kthyen përsëri tek trafikanti, i cili ia ktheu paratë.
Por, nuk kishte përfunduar. Nguyen u detyrua që të martohet me burrin e dytë.
Strehë për viktimat
Fondacioni Lidhjet e Pacifikut, ka një strehë për të gjithë viktimat e trafikimit në qytetin e Lao Cai, në veri të Vietnamit. Aty vajzat e reja mund të qëndrojnë për dy ose tre vite. Ato shkojnë në shkollë si dhe në trajnime, mësojnë art, gatim e shumë gjëra të tjera. Duke qëndruar së bashku me gratë e tjera që kanë të njëjtën eksperiencë si to, kjo strehë u ndihmon atyre që të rimarrin veten dhe të gjejnë punë.
Organizata e Diep Vuong, gjithashtu mundohet t’ua shpjegojë vajzave të reja rrezikun që u kanoset nga trafikantët.
